Pali
Namo tassa bhagavato arahato sammāsambuddhassa
3.5.6 Daṇḍasuttaṃ
Evaṃ me sutaṃ– ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sambahulā kumārakā antarā ca sāvatthiṃ antarā ca jetavanaṃ ahiṃ daṇḍena hananti. Atha kho bhagavā pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Addasā kho bhagavā sambahule kumārake antarā ca sāvatthiṃ antarā ca jetavanaṃ ahiṃ daṇḍena hanante.
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi–
“Sukhakāmāni bhūtāni, yo daṇḍena vihiṃsati;
attano sukhamesāno, pecca so na labhate sukhaṃ.
Sukhakāmāni bhūtāni, yo daṇḍena na hiṃsati;
attano sukhamesāno, pecca so labhate sukhan”ti.
Mucalindavaggo, Udānapāḷi, Khuddakanikāye
Vocabulary
- antarā + antarā - in between
- daṇḍena - [instr.] by a stick
- hananti - thresh, kill
- hiṃsati - injure, kill
- kumārakā - boys
- nivāsetvā - [ger.] having dressed
- pubbaṇhasamayaṃ - the forenoon
- sambahulā - some
- sukhakāmāni - [sukha + kāmāni (pl.)] happiness + desire
- sukhamesāno - [sukhaṃ + esāno] happiness + longing