Pali
Namo tassa bhagavato arahato sammāsambuddhassa
1.2.6 Dutiyachiggaḷayugasuttaṃ - The Second Simile of the Turtle
“Seyyathāpi, bhikkhave, ayaṃ mahāpathavī ekodakā assa. Tatra puriso ekacchiggaḷaṃ yugaṃ pakkhipeyya. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya.
Tatrassa kāṇo kacchapo. So vassasatassa vassasatassa accayena sakiṃ sakiṃ ummujjeyya. Taṃ kiṃ maññatha, bhikkhave, api nu kho kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā”ti?
“Adhiccamidaṃ, bhante, yaṃ so kāṇo kacchapo vassasatassa vassasatassa accayena sakiṃ sakiṃ ummujjanto amusmiṃ ekacchiggaḷe yuge gīvaṃ paveseyyā”ti.
“Evaṃ adhiccamidaṃ, bhikkhave, yaṃ manussattaṃ labhati. Evaṃ adhiccamidaṃ, bhikkhave, yaṃ tathāgato loke uppajjati arahaṃ sammāsambuddho. Evaṃ adhiccamidaṃ, bhikkhave, yaṃ tathāgatappavedito dhammavinayo loke dippati. Tassidaṃ bhikkhave, manussattaṃ laddhaṃ, tathāgato loke uppanno arahaṃ sammāsambuddho, tathāgatappavedito ca dhammavinayo loke dippati.
“Tasmātiha, bhikkhave, ‘idaṃ dukkhan’ti yogo karaṇīyo, ‘ayaṃ dukkhasamudayo’ti yogo karaṇīyo, ‘ayaṃ dukkhanirodho’ti yogo karaṇīyo, ‘ayaṃ dukkhanirodhagāminī paṭipadā’ti yogo karaṇīyo’ti.”
Papātavaggo, Saccasaṃyuttaṃ, Mahāvaggo, Saṃyuttanikāyo
Vocabulary
- accayena - [accaya + ena] lapse, passing away + instr.: after the laps of…
- adhiccamidaṃ - [a + dhicca + m + idaṃ] without + a cause + this, unlikely
- amusmiṃ - [asu (dem. pron.) + loc.] that, that one
- api - indecl.: moreover, further on
- dakkhiṇo - right, southern
- dippati - to shine (forth)
- dukkhanirodhagāminī - [dukkha + nirodha + gāminī] the method of walking the path of …
- dukkhanirodho - [dukkha + nirodho] eradication, cessation + suffering
- dukkhasamudayo - [dukkha + sam + udayo] arising, origination + suffering
- dukkho - suffering
- ekacchiggaḷaṃ - [eka + c + chiggaḷaṃ] one + hole
- ekodakāassa - [eka + odakā + assa] one + water + would be
- gīvaṃ - [gīvā + ṃ] the neck, throat
- kāṇo - blind
- kacchapo - [kacchapo] turtle, tortoise
- karaṇīyo - [karoti + ger.] what ought to be done, duty, obligation
- kiṃ nu kho - what is it then
- mahāpathavī - [mahā + pathavī] great + earth
- maññatha - [maññati + a + tha] what do you think, believe, imagine
- paṭipadā - [paṭi + padā] means of reaching a destination
- pacchimo - western
- pakkhipeyya - [pakkhipeti + eyya] to throw
- paveseyyā - [paveseti + eyyā] caus.: to make enter
- puratthimo - eastern
- saṃhareyya - [saṃharati + eyya] to draw, collect, take up, pull, push
- sakiṃ - [sakiṃ (adv.)] once
- seyyathāpi - [seyyathā + pi] just so, as alike
- tamenaṃ - [taṃ + enaṃ] this + that (that very)
- tasmātiha - [tasmā/abl. + iti + ha/emph.part.] accordingly (thus surely indeed)
- ummujjeyya - [ummujjati + eyya] emerge, rise up
- uttaro - northern
- vāto - wind
- vassasatassa - [vassa + sata + assa] a year + hundred + of
- yogo - practise
- yugaṃ - yuga + ṃ yoke