Pali
Namo tassa bhagavato arahato sammāsambuddhassa
3.1.8 Upaḍḍhasuttaṃ
Evaṃ me sutaṃ:
Ekaṃ samayaṃ bhagavā sakyesu viharati nagarakaṃ nāma sakyānaṃ nigamo. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca: “upaḍḍhamidaṃ, bhante, brahmacariyaṃ, yadidaṃ– kalyāṇamittatā kalyāṇasahāyatā kalyāṇasampavaṅkatā”ti.
“Mā hevaṃ, ānanda, mā hevaṃ, ānanda! Sakalamevidaṃ, ānanda, brahmacariyaṃ, yadidaṃ– kalyāṇamittatā kalyāṇasahāyatā kalyāṇasampavaṅkatā. Kalyāṇamittassetaṃ, ānanda, bhikkhuno pāṭikaṅkhaṃ kalyāṇasahāyassa kalyāṇasampavaṅkassa– ariyaṃ aṭṭhaṅgikaṃ maggaṃ bhāvessati, ariyaṃ aṭṭhaṅgikaṃ maggaṃ bahulīkarissati.
Kathañcānanda, bhikkhu kalyāṇamitto kalyāṇasahāyo kalyāṇasampavaṅko ariyaṃ aṭṭhaṅgikaṃ maggaṃ bhāveti, ariyaṃ aṭṭhaṅgikaṃ maggaṃ bahulīkaroti? Idhānanda, bhikkhu sammādiṭṭhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ; sammāsaṅkappaṃ bhāveti vivekanissitaṃ …pe… sammāvācaṃ bhāveti …pe… sammākammantaṃ bhāveti …pe… sammā-ājīvaṃ bhāveti …pe… sammāvāyāmaṃ bhāveti …pe… sammāsatiṃ bhāveti …pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, ānanda, bhikkhu kalyāṇamitto kalyāṇasahāyo kalyāṇasampavaṅko ariyaṃ aṭṭhaṅgikaṃ maggaṃ bhāveti, ariyaṃ aṭṭhaṅgikaṃ maggaṃ bahulīkaroti.
Tadamināpetaṃ, ānanda, pariyāyena veditabbaṃ yathā sakalamevidaṃ brahmacariyaṃ, yadidaṃ– kalyāṇamittatā kalyāṇasahāyatā kalyāṇasampavaṅkatā. Mamañhi, ānanda, kalyāṇamittaṃ āgamma jātidhammā sattā jātiyā parimuccanti, jarādhammā sattā jarāya parimuccanti; maraṇadhammā sattā maraṇena parimuccanti; sokaparidevadukkhadomanassupāyāsadhammā sattā sokaparidevadukkhadomanassupāyāsehi parimuccanti. Iminā kho etaṃ, ānanda, pariyāyena veditabbaṃ yathā sakalamevidaṃ brahmacariyaṃ, yadidaṃ– kalyāṇamittatā kalyāṇasahāyatā kalyāṇasampavaṅkatā”ti.
Avijjāvaggo, Maggasaṃyuttaṃ, Mahāvaggo, Saṃyuttanikāyo
Vocabulary
- āgamma – adv. owing to, by means of
- bahulīkarissati - [bahulī + karoti + issati] (fut.) much of + will make
- bhāvessati - [bhāvati + issati] (fut.) will become
- hevaṃ - [hi + evaṃ] surely, this
- iminā - idam (instr.) by this
- jātidhammā - [jāti + dhammā] birth + having the nature
- jarādhammā - [jarā + dhammā] old age + having the nature
- kalyāṇamittatā - friendship with the virtuous
- kalyāṇamittassetaṃ - [kalyāṇamitta+assa+etaṃ] of the friendship with the virtuous + this
- kalyāṇasahāyatā - companionship with the virtuous
- kalyāṇasampavaṅkatā - being colleagues of the virtuous
- mamañhi mamam - [(acc. of maṃ) + ñ + hi] me + because
- maraṇadhammā - subject to death
- nagarakaṃ - fortified city
- nigamo - little town, marketplace
- nirodhanissitaṃ - [nirodha + nissita] (adj.) elimination + dependent, hanging on
- nisīdi - aor. sat down
- nisinno – pp. having sat down
- pāṭikaṅkhaṃ - to be expected
- parimuccanti - they are completely liberated
- pariyāyena – instr. by this mode of reasoning
- sakalamevidaṃ - [sakala + evam + idaṃ] entire + thus + this
- sokaparidevadukkhadomanassupāyāsadhammā – [soka+parideva+dukkha+domanassa+upāyāsa+dhammā] subject to sorrow + lamentation + pain + distress + despair
- tadamināpetaṃ - [tam/d + iminā +api + etaṃ] thus + in these ways + and + this
- upaḍḍhamidaṃ - [upa + aḍḍha + m + idaṃ] one half + this
- virāganissitaṃ - given to dispassion
- vivekanissitaṃ - given to seclusion
- vossaggapariṇāmiṃ - [vossagga + pariṇāmiṃ] relinquishing + handing over