Pali
Namo tassa bhagavato arahato sammāsambuddhassa
3.2.4.2 Saccapabbaṃpabbaṃ, Part Two: Samudayasaccaniddeso
‘‘Katamañca, bhikkhave, dukkhasamudayaṃ ariyasaccaṃ?
Yāyaṃ taṇhā ponobbhavikā nandīrāgasahagatā tatratatrābhinandinī, seyyathidaṃ – kāmataṇhā bhavataṇhā vibhavataṇhā.
Sā kho panesā, bhikkhave, taṇhā kattha uppajjamānā uppajjati, kattha nivisamānā nivisati? Yaṃ loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Kiñca loke piyarūpaṃ sātarūpaṃ?
Cakkhu loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati. Sotaṃ loke…pe… ghānaṃ loke… jivhā loke… kāyo loke… mano loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Rūpā loke… saddā loke… gandhā loke… rasā loke… phoṭṭhabbā loke… dhammā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Cakkhuviññāṇaṃ loke… sotaviññāṇaṃ loke… ghānaviññāṇaṃ loke… jivhāviññāṇaṃ loke… kāyaviññāṇaṃ loke… manoviññāṇaṃ loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Cakkhusamphasso loke… sotasamphasso loke… ghānasamphasso loke… jivhāsamphasso loke… kāyasamphasso loke… manosamphasso loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Cakkhusamphassajā vedanā loke… sotasamphassajā vedanā loke… ghānasamphassajā vedanā loke… jivhāsamphassajā vedanā loke… kāyasamphassajā vedanā loke… manosamphassajā vedanā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Rūpasaññā loke… saddasaññā loke… gandhasaññā loke… rasasaññā loke… phoṭṭhabbasaññā loke… dhammasaññā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Rūpasañcetanā loke… saddasañcetanā loke… gandhasañcetanā loke… rasasañcetanā loke… phoṭṭhabbasañcetanā loke… dhammasañcetanā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Rūpataṇhā loke… saddataṇhā loke… gandhataṇhā loke… rasataṇhā loke… phoṭṭhabbataṇhā loke… dhammataṇhā loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Rūpavitakko loke… saddavitakko loke… gandhavitakko loke… rasavitakko loke… phoṭṭhabbavitakko loke… dhammavitakko loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati.
Rūpavicāro loke… saddavicāro loke… gandhavicāro loke… rasavicāro loke… phoṭṭhabbavicāro loke… dhammavicāro loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati. Idaṃ vuccati, bhikkhave, dukkhasamudayaṃ ariyasaccaṃ.”
Mahāsatipaṭṭhānasuttaṃ, Mahāvaggapāḷi, Dīghanikāyo
Vocabulary
- bhavataṇhā - [bhava + taṇhā] becoming + craving
- cakkhu - eye
- cakkhusamphasso - [cakkhu + saṃ + phasso] eye + with + touch, contact: contact with the eye
- gandhā - smell
- gandhavicāro - [gandha + vicāro] smell + thinking over, pondering
- ghāna - nose
- jivhā - tongue
- kāmataṇhā - [kāma + taṇhā] sensual pleasures + craving
- kattha - (adv.) where, where to, whither
- nandīrāgasahagatā - [nandī + rāga + saha + gatā] enjoyment, rejoicing in + sensuous lust, pleasure + together + going
- nivisamānā - [nivisati (pp.)] sit down, settle
- phoṭṭhabbā - touch
- piyarūpaṃ - [piya + rūpaṃ] pleasant, dear + form, object
- ponobbhavikā - [pona + b + bhavikā] leading to + birth
- rasā - taste
- rūpā - form, body
- rūpasañcetanā - [rūpa + saṃ + cetanā] form + perception, cognition, intention
- saddā - sound
- saddavitakko - [sadda + vitakko] sound + (initial) thought
- sātarūpaṃ - [sāta +rūpaṃ] pleasant, agreeable + form, object
- seyyathidaṃ - [seyyathapi + idaṃ] just as + this
- sota - ear
- tatratatrābhinandinī - [tatra + tatra + ābhinandi] here + there + finding pleasure
- uppajjamānā - [uppajjati (pp.)] arise, occur
- vibhavataṇhā - [vi + bhava + taṇhā] not + becoming + craving