Pali
Namo tassa bhagavato arahato sammāsambuddhassa
3.4.12 Pañhabyākaraṇasuttaṃ
“Cattārimāni, bhikkhave, pañhabyākaraṇāni. Katamāni cattāri?
Atthi, bhikkhave, pañho ekaṃsabyākaraṇīyo;
atthi, bhikkhave, pañho vibhajjabyākaraṇīyo;
atthi, bhikkhave, pañho paṭipucchābyākaraṇīyo;
atthi, bhikkhave, pañho ṭhapanīyo. Imāni kho, bhikkhave, cattāri pañhabyākaraṇānī”ti.
“Ekaṃsavacanaṃ ekaṃ, vibhajjavacanāparaṃ;
tatiyaṃ paṭipuccheyya, catutthaṃ pana ṭhāpaye.
Yo ca tesaṃ tattha tattha, jānāti anudhammataṃ.
catupañhassa kusalo, āhu bhikkhuṃ tathāvidhaṃ.
Durāsado duppasaho, gambhīro duppadhaṃsiyo;
atho atthe anatthe ca, ubhayassa hoti kovido.
Anatthaṃ parivajjeti, atthaṃ gaṇhāti paṇḍito;
atthābhisamayā dhīro, paṇḍitoti pavuccatī”ti.
Rohitassavaggo, Catukkanipātapāḷi, Aṅguttaranikāyo
Vocabulary
- atthābhisamayā - [attha + abhisamayā] meaning + comprehension: grasping of what is proficient
- ekaṃsabyākaraṇīyo - [ekaṃ + sa + veyyā + karaṇīyo (fpp.)] one + with + explanation (+ should be given)
- ṭhapana - [nt.] letting alone, omission
- duppadhaṃsiyo - [du + appadhaṃsiyo] difficult + to be destroyed
- duppasaho - [du + p + pasaho] difficult + to overcome
- durāsado - [du + r + āsado] difficult + to offend, lay hand on
- paṭipucchābyākaraṇīyo - [paṭipucchā + byākaraṇīyo] counterquestion / inquiry + explanation
- pañhabyākaraṇāni - [pañha + byākaraṇāni] investigation / question + explanation
- vibhajjabyākaraṇīyo - [vibhajja + byākaraṇīyo] dividing / analysing + explanation