Pali
Namo tassa bhagavato arahato sammāsambuddhassa
2.1.11 Paṭhamabrahmaññasuttaṃ & Dutiyabrahmaññasuttaṃ - About Being a Brahmañña and the Fruits Thereof & The Purpose of Being a Brahmañña
Sāvatthinidānaṃ.
“Brahmaññañca vo, bhikkhave, desessāmi, brahmaññaphalāni ca. Taṃ suṇātha. Katamañca kho, bhikkhave, brahmaññaṃ?
Ayameva ariyo aṭṭhaṅgiko maggo, seyyathidaṃ– sammādiṭṭhi …pe… sammāsamādhi. Idaṃ vuccati, bhikkhave, brahmaññaṃ.
Katamāni ca, bhikkhave, brahmaññaphalāni? Sotāpattiphalaṃ, sakadāgāmiphalaṃ, anāgāmiphalaṃ, arahattaphalaṃ– imāni vuccanti, bhikkhave, brahmaññaphalānī”ti.
Paṭipattivaggo, Maggasaṃyuttaṃ, Mahāvaggo, Saṃyuttanikāyo
Sāvatthinidānaṃ.
“Brahmaññañca vo, bhikkhave, desessāmi, brahmaññatthañca. Taṃ suṇātha. Katamañca, bhikkhave, brahmaññaṃ?
Ayameva ariyo aṭṭhaṅgiko maggo, seyyathidaṃ– sammādiṭṭhi …pe… sammāsamādhi.
Idaṃ vuccati, bhikkhave, brahmaññaṃ.
Katamo ca, bhikkhave, brahmaññattho? Yo kho, bhikkhave, rāgakkhayo dosakkhayo mohakkhayo– ayaṃ vuccati, bhikkhave, brahmaññattho”ti.
Paṭipattivaggo, Maggasaṃyuttaṃ, Mahāvaggo, Saṃyuttanikāyo